Minangkabau
Home > Kaskuser Regional > INDONESIA > SUMATERA > Minangkabau > Adaik, Budayo, Seni, & Sejarah Minangkabau
Total Views: 36405 Share : Facebook ShareFacebook Twitter ShareTwitter Google+ ShareGoogle+
Page 5 of 29 |  < 1 2 3 4 5 6 7 8 9 10 >  Last ›

andreandhika - 09/11/2009 10:06 AM
#81

Kato Pusako (1) Alam Minangkabau

Spoiler for Isi

Elok ranahnyo Minangkabau
Rupo karambia tinggi tinggi
Cando rumpuik gantie gantielan
Rupo pinangnyo linggayuran
Bukik baririk kiri kanan
Gunuang Marapi jo Singgalang
Tandikek jo gunuang Sago
Pasaman jo gunuang Talang
Aianyo janiah ikannyo jinak

Laweh alamnyo bakeh tagak
Sawah batumpuak di nan data
Ladang babidang di nan lereang
Sawah bajanjang banda buatan
Sawah ladang labuah nan pasa
Taranak kambang padi manjadi
Buah jaguang maampai suto
Padi masak jaguang maupiah
Lah masak padi disawah
Padi diladang manguniang pulo
Ladang tabu amnyintak rueh
Pisang badukuang ditandannyo
Antimun mangarang bungo
Batang labu marangtang tali
Buah taruang ayun ayunan
Buah lado manbintang timue
Buah kacang taji tajian
Anak rancak minantu malin

Sajak durian ditakuak rajo
Sialang balantak basi
Buayo nan putiah daguak
Sirangkak nan badangkang
Sampai taratak aia hitam
Sampai riak nan badabua
Sampai kabateh indrapuro
Sampai ka siak indragiri
Hinggo sipisak pisau hanyuik
Sampai sikilang aia bangih.

dima asa titiak palito
Dibaliak telong nan batali
Dimano asa niniak kito
Dari lereang gunuang marapi
Di galundi nan baselo
Dakek bukik siguntang guntang
Di sinan lurah satungka banang
Sinan lurah ndak baraia
disinan bukik ndak barangin
Sinanlah banta barayun
Disinan batu hamparan putiah

Panakiak pisau sirauik
Ambiak galah batang lintabuang
Salodang ambiak ka nyiru
Nan satitiak jadikan lauik
Nan sakapa jadikan gunuang
Alam takambang jadikan guru

Bungka ganok manahan cubo
Ameh batu manahan uji
Naraco pantang bapaliang
Anak nagari sakato hati
Satapak bapantang suruik
Salangkah pantang kumbali

ado pun kasadonyo kito di Minangkabau
Nan disungkuik langik nan ditanai bumi
Nan saedaran kuliliang gunuang marapi
Nan mahuni daerah bagian baraik
Samato lah banamo pulau andaleh
Bapandirian bak kato nan tuo tuo
Pulai juo nan batingkek naiak
Maninggakan rueh jo buku
Manusia nan bapangkek turun
Maninggakan adaik jo limbago
Gajah mati maninggakan gadiang
Harimau mati maninggakan balang
Manusia mati maninggakan jaso

Lah jadi kabiasaan bagi kito
Rantau nan barajo
Luhak nan bapanghulu
Lah dibiasokan pulo dek adaik kito
Adaik nagari nagari nan batuo
Mambuang sagalo nan buruak
Mamakai sagalo nan baiak
Nan sasuai pulo jo kato nabi
Malarang urang babuek jahek
Manyuruah urang babuek baiak

Mulai sajak maso dahulu
Sampai pulo pado maso kini
Sajak samulo sumua di gali
Sajak mulo nagari dihuni
Adaik dipakai, syarak nan lazim
Duo hukum nan lah digunokan
Hukum adaik jo hukum Syarak.
(KP-1)

Disadur dari buku "Kato Pusako"
andreandhika - 09/11/2009 10:15 AM
#82

Kato Pusako (2) Tambo Minangkabau

dek kato pusako 2 ko alah ado postingannyo, jadi wak lanjuik langsuang ka kato pusako 3

Kato Pusako (3) Rumah Gadang


Spoiler for Isi
Rumah gadang sambilan ruang
Salanja kudo balari
Sapakiak budak maimbua
nan salitak kuciang malompek
Tiangnyo basandi batu
Sandi banamo alue adaik
Tonggak banamo kasandaran
Tonggak gaharu lantai candano
Atok ijuak dindiang baukie
Cando bintangnyo bakilauan
Gonjongnyo rabuang mambuncik
Bubungannyo burak katabang
Tuturannyo labah mangirok
Sapantaun karo bajuntai
Paran bagamba ula ngiang
Bagaluik rupo ukie Cino
Batatah jo aie ameh
Salo manyalo aie perak
Taralinyo gadiang balariak
Bangunan gajah maharam
Anjuang batingkek ba alun alun
Katampaik paranginan puti
limpapeh rumah nan gadang
Sumarak didalam kampuang
Hiasan dalam nagari

Rumah gadang salangko gadiang
Sakijok kubin malayang
Sakuaiak kuaran tabang
Tunggak dipiliah dalam rimbo
Banyaklah urang nan maramu
Tiang tapi panague alek
Tiang temban suko mananti
Tiang tangah manti salapan
Tiang dalam puti bakuruang
Tiang panjang si Majolelo
Tiang salek dindiangnyo samie
Tiang dapue suko dilabo
Disapu jo tanah kawi
Ukie tonggak jadi ukuran
dama tirih bintang gumarau
Indak pueh mato mamandang
Baanjuang pangka jo ujuang
Paran bak ula mangulampai
Awek awek kambang bataduah
Dampa dampa siula paduak
Rasuaknyo tareh limpato
Palanca puyuah balari
Atok ijuak batatah timah
Alue saga labah marasok
Antiang antiang disemba buruang
Taranwang maancang tarang
Calekak padang basentak

Kok diliek ka lantainyo
Ka ujuang rajo babandiang
Ka pangka surambi papek
Data balantai papan
Licin balantai kulik
Pautan undang sangkutan pusako
Tampek maniru manuladan
Mamakai raso jo pareso
Manganduang malu jo sopan
Raso samo dibaok naiak
Pareso samo dibawo turun

Batu tapak-an carano basa
Ciluak mariau baru sudah
Pananjue piriang nan bapanto
Janjangnyo perak baelo
Anak janjang kanso balariak
Sangkuik baukie tampuak manggih
Pudiang perak paga didalam
Pudiang ameh paga di lua
Halaman cindai tagerai
kasiak badarai bak ditintiang
Jarum sabuah ndak kahilang

Lumbuang baririk di halaman
Rangkiang tujuah sajaja
Kapuak gadang salo manyalo
Kapuak ketek salek manyalek
Ditapi banamo sitinjau lauik
Paninjau pincalang masuak
Kapanague dagang kamalamam
Panenggang anak dagang lalu
Ditangah banamo si Bayau bayau
Lumbuang makanan patang pagi
Dipangka banamo si tangka Lapa
Tampaik nan bangsaik salang tenggang
Panangka lapa dalam kaum
Kok tibo musim gantuang tungku
Sabuah banamo Pati Jantan
Untuak tungganai dalam kaum
Nan banamo Rangkiang Kapuak Galuang
Untuak panghulu kapalo suku
Nan banamo Arimau pauni koto
Guno pambangunan di nagari
Birawari lumbuang nan banyak
Makanan anak kamanakan

Lasuangnyo batu balariak
Alu limpato dibulekkan
Limau manih sandaran alu
Kamuniang pautan kudo
Langkok batabek parikanan
Aienyo janiah bak mato kuciang
Ikan gariangnyo jinak jinak
Ikan rayonyo baradai ameh
Jikok ditimpo paneh patang
Kilau kamilau rupo sisiaknyo
Silaulah mato mamandangnyo
Hiduik batampek mati bakubue
Kuburan hiduik di rumah gadang
Kuburan mati ditangah padang

Kuaik rumah karano sandi
Rarak sandi rumah binaso
Kuaik bangso karano budi
Rusak budi hancualah bangso.

Disadur dari buku "Kato Pusako"
andreandhika - 09/11/2009 10:36 AM
#83

Kato Pusako (4) Raso jo Pareso

Spoiler for Isi

nan dimakan raso
Nan diliek rupo
Nan didanga bunyi
Nan rancak di awak
Nan katuju di urang

Nak tahu dipadeh lado
Nak tahu di asin garam
Mangauik sahabih gauang
Mamakan sahabih raso
Elok diurang katuju dek awak
disinan baru dijalankan

Nasi dimakan raso sakam
Aie diminum raso duri

Raso dibibie tapi cawan
alun dibali alah tajua
Alun dimakan alah taraso

Ganggam ganggam baro
Taraso Angek dilapehkan
Sio sio manjariang angin
Taraso lai dapek tidak

Tasirok darah didado
Gamuruah darah kamuko
Hati nan arok arok cameh
Arok ba bak raso kabuliah
Cameh bak raso ka marugi

Dek ati mati, dek mato buto
Dek raso binaso
Babue raso kamuntah
Bacarai raso kamati
Bapisah raso kahilangan

Jauah bajalan banyak diliek
Lamo hiduik banyak dirasoi

Rarak Kalikih dek bindalu
Tumbuah sarumpun ditapi tabek
Kok habih raso jo malu
Bak kayu lungga pangabek

anak urang koto ilalang
Nak lalu ka pakan baso
Malu sopan jikok lah hilang
abih lah raso jo pareso

Disadur dari buku "Kato Pusako"
andreandhika - 09/11/2009 10:52 AM
#84

Kato Pusako (5) Pitaruah Bundo

Spoiler for Isi

nan sakapa alah diambiak urang
Nan sapinjik tingga diawak
Walau dibalun sabalun kuku
Jikok dikambang saleba alam
Walau sagadang bijo labu
Bumi jo langik ado didalam

Latiak latiak tabang ka pinang
Singgah manyasok bungo rayo
Aie satitik dalam pinang
Sinan bamain ikan rayo



Baburu babi ka batu balang
Mandapek buluah jo rotan
Guru mati kitablah hilang
Sasek kasia ditanyokan

Oi buyuang lakehlah gadang
Kapambangkik batang tarandam
Kapaapuih malu dikaniang
Kapanunggu piutang lamo
Kapanapiak mato padang
Kapanantang matohari
Kapalawan dunie urang
Kapandiri pusako lamo

Bilo kato lah ditanam dihati
Jalehlah sagalo rahasio alam
Jikok diajun sitamba lamo
Sabarih indak buliah ilang
Satitiak bapantang lupo

Laka jo dulang didalam lubuak
Pandan baduri malendo jalan
Aka hilang paham tatumbuak
Basarah diri pado tuhan

Kilek camin lah ka muko
Kilek baliuang la ka kaki
Kilek kato lah kahati
Tahu diombak nan basabuang
Tahu diangin nan basiuik
Tahu dirantiang kamalantiang
Tahu diduri nan ka mancucuak
Tahu didahan nan ka mahimpok
Tahu ditunggue nan ka manaruang
Ingek ingek sabalun kanai
Nan dibawah kok mahimpik
gabak dihulu tando ka hujan
Cewang dilangik tando kapaneh

Manusia tahan kieh
Binantang tahan palu
Tagisia labiah bak kanai
Tasingguang labiah bak jadi

Diagak mako diagiah
Dibaliak mako dibalah
bajalan manuju bateh
Balaie manuju pulau

Kuaik rumah karano sandi
Rusak sandi rumah binaso
Kuaik bangso karano budi
Rusak budi hancualah bangso

Basilek diujuang lidah
Malangkah dipangka karih
Bamain diujuang padang
Tahan dikieh kato putuih

Tahu dikilek sarato bayang
Tahu digelek kato habih
Tahu diherang gendeag
Sarato kurenah jo bainah

Bapikie palito hati
nanang saribu aka
Taraso lamak jan dilulue
Taraso pahik jan diluahkan
Bajalan injek injek langkah
Bakato paliharo lidah
Hiduik jan bak pucuak aru
Maikuik kama kareh angin
Iyokan nan di urang
Lalukan nan nan di awak
Tunjuak luruih kalingkiang bakaik
Guntianglah baju nak rang Guguak
Dijaik jan disudahkan
Bao kakincia lah dahulu
Kok manih jan diraguak
Kok paik jan diluahkan
Bao bapikia lah dahulu

adaik mudo manangguang rindu
Adaik tuo manangguang ragam
Kok condong jan kamari rabah
Luruih tantang baih adaik



Budi jan tajua
Paham jan tagadai
Kok kayo kayo dek budi
Nak mulie mulie dek baso
Budi nan indak katinjauan
Paham nan indak kamaliangan

Iman nan tak buliah ratak
Kamudi nan tak buliah patah
Padoman nan tak buliah tagelek
Haluan nan tak buliah barubah

Sayang jo anak di lancuik
Sayang jo kampuang ditinggakan
Ujan ameh dinagari urang
Ujanbatu dinagari awak
Kampuang nan jauah dibantu juo

Mati batungkek budi
Hiduik bakarilahan
Dipakai raso jo pareso
Ditimbang jo nyao badan

Nak luruih rantangkan tali
Nak tinggi tingkekkan budi
Nak aluih babaso basi
Nak elok lapangkan hati
Nak mulie tapek'i janji
Nak taguah paham dikunci
Nak kayo kuaik mancari
Nak tuah batabue budi
Nak namo tinggakan jaso
Nak pandai rajin baraja

Kahiliah jalan ka Padang
Ka mudiak jalan ka Ulak-an
Kok musuah indak dihadang
Kok basuo pantang di-ilakkan

Kalo ndak basuo dijalannyo
Namuah bapua pua dagiang
Namuah bakacau kacau darah
Tando sabana laki laki

Dari buku "Kato Pusako"
no2er - 09/11/2009 10:54 AM
#85

request adat, istiadat termasuk hukum pembagian warisan menurut budaya minangkabau kaka' oo
andreandhika - 09/11/2009 11:04 AM
#86

Quote:
Original Posted By no2er
request adat, istiadat termasuk hukum pembagian warisan menurut budaya minangkabau kaka' oo


jadih tuak, wak cari lu dih
beko kok alah dapek, wak post disiko


kok ado kawan2 nan lain nan punyo, tolong posting disiko dih
\)
andreandhika - 09/11/2009 11:16 AM
#87

Kato Pusako (6) Minangkabau Balingkuang Adaik

Spoiler for Isi

adaik nan sabana adaik
Adaik nan nan diadaikkan
Adaik nan taradaik
Adaik istiadaik

Adaik nan sabana adaik
Nan tak lapuak dek ujan
Nan tak lakang dek paneh
Jikok diasak indak layua
Jikok dibubuik indak mati

Adaik basandi syarak
Syarak basandi kitabullah
Syarak mangato adaik mamakai
Adaik manurun syarak mandaki

Adaik basisampiang
Syarak batilanjang
Adaik babuhuasintak
Syarak babuhua mati
Adaik nan bapaneh
Syarak nan balinduang

Nan adaik laku
Nan pusako kato
Adaik malingka
Pusako marungguah
Adaik panuah ka ateh
Syarak panuah kabawah

Adaik dipakai baru
Kain dipakai usang
Alam takambang jadi guru
Nan tak lapuak dek ujan
Nan tak lakang dek paneh

Adaik nan kawi
Syarak nan lazim
Adaik bajanjang naiak
Batanggo turun

Adaik bacupak bagantang
Cupak papek gantang piawai
Adaik babarih babalabeh
ketek balingka tanah
Gadang balingka aua

Baradaik sapanjang jalan
Bacupak sapanjang batuang
Cupak batando Satu
Adaik batando duo

Nan salingkuang cupak adaik
Nan sapayuang sapatagak
Adaik batiru batuladan
Adaik samo diisi
Limbago samo dituang
Adaik limbago basukatan
Samo tajadi dialamko
Dunie akiraik inyo saikek

Harato salingka suku
Adaik salingka nagari
Kasudahan adaik ka balairuang
Kasudahan dunie ka akiraik
Kasudahan gadang di panghulu
Mamak kapalo mamaliharo
Kaum kaganti hulu

Adaik pasang baturun naiak
Adaik juaro bakalah manang
Adaik sudaga barugi labo
Adaik panghulu bapadang laweh, baalam leba
Adaik hiduik tolong manolong
Adaik mati janguak manjanguak

Dibalah balah dipatigo
Sirauik pambalah rotan
Luhak dibagi tigo
Adaik limbago dibagi salapan

Luhak nan tigo
Pertamo luhak Tanah Data
Kaduo luhak Agam
Katigo luhak Limo Puluah Koto

Adaik limbago nan salapan
Nan ampek tabang ka langik
aso bulan, duo matohari
Tigo bintang, ampek timue (fajar)
Nan ampek tingga di dunie
Rumah gadang, lumbuang baperong
Sawah gadang, banda buatan

Adaik taluak timbunan kapa
Adaik lurah timbunan aie
Kok bukik timbunan angin
Biaso gunuang timbunan kabuik
Adaik pamimpin tahan upek
Cacek jo sanjuang pamenan hiduik

Pulau batingkek naiak
Maninggakan rueh jo buku
Manusia bapangkek turun
Mambao adaik jo limbago
Hiduik balingkuang adaik
Mati balingkuang tanah

Simuncak mati tarambau
Kaladang mambao ladiang
Laja laja dikapalonyo
Adaik jo syarak di minangkabau
Sapantun aua jo tabiang
Sanda manyanda kaduonyo

Sakali ladang baganti
Sakali tanamanbabuah
Tumbuahnyo disinan juo
Sakali langgam barubah
Namun adaik baitu juo

urang Makah mambao taraju
Urang Bagdad mambao talue
Talue dimakan bulan puaso
Rumah gadang basandi batu
Adaik basandi alue
alua tu kaganti rajo

Adaik nan biaso dipakai
Limbago nan biaso dituang
Nan elok nan dipakai
Nan buruak nan dibuang

Adaik panuah ka ateh
Syarak panuah kabawah
Usang usang dipabaharui
Lapuak lapuak dikajangi

Cupak sapanjang batuang
Adaiksapanjang jalan
Dimano bumi dipijak
Disinan langik dijunjuang
Disinan pulo adaik dipakai

Adaik diisi limbago dituang
Adaik lamo pusako usang
Adaik didunie baleh mambaleh
Syariaik palu mamalu
abih adaik bakarilahan
Abih cupak dek buatan

Adaik badunsanak, dunsanak dipatahankan
Adaik basuku, suku dipatahankan
Adaik bakampuang, kampuang dipatahankan
Adaik babangso, bangso dipatahankan
Adaik banagara, nagara samo dipatahankan
Sanda manyanda bak aua jo tabiang

Kaluak paku kacang balimbiang
Tampuruang lenggang lenggokkan
Bao manurun ka saruaso
Tanamlah siriah jo ureknyo
Anak dipangku kamanakan dibimbiang
Urang kampuang dipatenggangkan
Tenggang nagari jan binaso
Tenggang sarato jo adaiknyo

Tajam alah celak pun ado
Tingga dibao manyampaikan
Adaik alah syarak pun ado
Tingga dikito mamakainyo

Pangka jaguang baurek mati
Umpan tingkariak anai anai
Dimano sajo kampuang dihuni
Disinan pulo adaik dipakai

Dimano kain kabaju
Lah diguntiang indaknyo sadang
Alah talakek mangko diungkai
Dimano nagari kamaju
Adaik sajati nan lah hilang
Dahan jo rantiang nan dipakai

alang tukang binaso kayu
Alang arih binaso badan
Alang malin rusak agamo
Alang pandai rusak nagari
Alang cadiak binaso adaik

Dimano bumi dipijak
Disinan langik dijunjuang
Dimano sumue digalie
Disinan aie disauak
Dimano nagari dihuni
Disinan adaik dipakai

Adaik banazar
Maniliak herang jo gendeang
Mamakai baso jo basi
Ba adaik balicak pinang
Batapuang batu
Basasi batukuak kayu

Dibao ribuik dibao angin
Dibao pikek dibao langau
Muluik jo hati kok balain
Pantangan adaik Minangkabau

Jatuah mumbang jatuah kalapo
Jatuah bairiang kaduonyo
Rusak adaik hancua pusako
Habihlah dayo kaduonyo

Kok ketek bari banamo
Kok gadang bari bagala
Nak tapek adaik jo limbago
Paham adaik nan nyato bana

Katiko ketek baduang jo kain
Alah gadang baduang jo adaik
Manti bajalan di nan kalam
Adaik bajalan di nan tarang

Manuruik sapanjang adaik
Dimano anjiang manyalak
Disinan biawak tajun
Dimano kato bamulai
Disinan bakasudahan

Gantang nan di budi caniago
Cupak nan di koto piliang
Adaik mamakai syarak mangato
Ujuik satu balain jalan

Adaik bakato
Baiyo mako bakato
Batolan mako bajalan
Adaik bajokok badukalo
Dunie baleh mambaleh
Sari'aik palu mamalu

Batagak panghulu sakato warih
Batagak rajo sakato alam
Mandirikan adaik sakato nagari

Panuah kapuak karano padi
Tagak sumpik karano isi
Badiri adaik dek limbago

Syarak banamo lazim
Adaik banamo kawi
Habih tahun baganti musim
Buetan nan usah diubahi

Gantang nan di budi caniago
Ditapuang batu dilicak pinang
Dituang adaik ka limbago
Dimulai malukih undang undang

Jalan dialiah dek urang lalu
Cupak dipapek dek urang manggaleh
Adaik dialiah dek urang datang

Adaik mudo manangguang rindu
Adaik tuo manangguang ragam
Kok condong jan kamari rabah
Luruih tantang barih adaik

Adaik bakiak caro mamanciang
Tauikkan jo umpan bada
Ibo diadaik katagiliang
Turuikkan malah putaran roda
Padang gantiang baranah ranah
Kailie jalan ka koto tinggi
Sasimpang jalan ka sikabau
Kok duduak iyosamo randah
Kok tagak iyo samo tinggi
Baitu adaik di Minangkabau

Alah bauriah bak sipasin
Kok bakiak alah bajajak
Walau batuka putaran musim
Sandi adaik jan dianjak

Bintang kejora tabik sanjo
Ilang manjalang tangah malam
Bisuak manjadi bintang juo
Batiuik angin dari utaro
Salo manyalo jo angin topan
Sinan adaik nyato paguno

Kato adaik pahamnyo aman
Malangkok-ie rukun jo syari'aik
Kalo elok pacik padoman
Santoso hiduik dunie akiraik

Nan adaik dalam nagari
Bulek sagiliang picak satapiak
Sabarek saringan kaduonyo
Urang mulie dalam nagari
Muluik manih basonyo baiak
Sakati limo nilai balinyo

Ditiliak duduak hukum adaik
Ateh bainah nan duo baleh
Sarintiak kudaraik jo iradaik
Disigi sako mangkonyo jaleh

Kato panghulu manyalasaikan
Mandareh kato dubalang
Adaik kok kurang takurasai
Dunie jadi mangapalang

Katalao mancari baluik
Bakelok jalan nan landai
Nak salamaik salamo hiduik
Eloknyo adaik dipakai

Sabab karano dek baitu
Tumbuahlah niaik didalam hati
Manuruik tamba nan dahulu
Sajarah adaik nan usali

Sajak adaik basandi syarak
Duo aturan nan tajalin
Dalam lauik tak ba ombak
Tagak dipadang tak baragin

Sababnyo kukuah adaik di Minang
Badirinyo karano dek limbago
Rusak karano panjajah datang
Barubah adaik dek kuasonyo

Kok bajua bamurah murah
Nan batimbang jawek ditanyoi
Panghulu kalo lah pacah
Adaik nan indak baguno lai

nan duo
Dikaji kato

Tasindorang jajak manurun
Tatukiak jajak mandaki
Adaik jo syarak kok tasusun
Bumi sanang padi majadi

Diatua cupak nan ampek
Dalam Tambo alah tasuo
Disinan paham mangko dapek

Disadur dari buku "Kato Pusako"
andreandhika - 09/11/2009 11:24 AM
#88

Kato Pusako (7) Limbago

Spoiler for Isi

nan dikatokan limbago adolah
Nan taraso di hati manuruik aka jo ilimu

adaik diisi limbago dituang
Ingek adaik jan nyo rusak
Jago limbago jan nyo sumbang
Gadang adaik dek limbago
Tagak sumpik dek isinyo

Kok indak ado barado
Indak tampuo basarang randah
Kok tak sabab bakarano
Indak limbago ka barubah

Limbago nan sapuluah dibagi ateh
Partamo cupak nan duo
Kaduo undang nan ampek
Katigo kato nan ampek

Cupak nan duo adolah
Partamo cupak usali
Kaduo cupak buetan

Undang undang nan ampek adolah
Partamo undang undang nagari
Kaduo undang undang urang dalam nagari
Katigo undang undang luhak
Kaampek undang undang nan duo puluah

Kato nan ampek adolah
Partamo kato pusako
Kaduo kato mupakaik
Katigo kato dahulu batapeki
Kaampek kato kudian kato bacari

Gulai kacang dalam bulango
Masak sanjo dimakanpagi
Dimakan anak mudo mudo
aso adaik duo limbago
Pakaian basamo dalam nagari
Binguang jo miskin jan dilendo

Disadur dari buku "Kato Pusako"
andreandhika - 09/11/2009 01:16 PM
#89

Kato Pusako (8) Cupak

Spoiler for Isi

nan sacupak indak kajadi sagantang
Cupak sapanjang batuang
adaik sapanjang jalan
Jalan dialiah urang lalu
Cupak dialiah urang panggaleh

Cupak lah tatagak, suri lah tarantang
Baharago diateh rupo, bacupak diateh tumbuah
Duduak jo cupak jo gantang
Cupak nan duo, cupak usali jo cupak buetan

Geleang bak cupak hanyuik
Umpamo tabuang sarueh
Geleang bak sipatuang hinggok
Bak kacang diabuih ciek
Bak kancah laweh arang
Lonjak bak labu dibanam

Adopun nan dikatokan cupak
Adolah umpamo pakaian nan disukoi dalam nagari
Sipaik cupak ado ampek macamnyo
Partamo cupak usali
Kaduo cupak buatan
Katigo cupak tiruan
Kaampek cupak nan piawai

Nan dikatokan cupak usali
Hubungan sangkuiktan sagalo manusia
Nan dikatokan cupak buetan
Hubungan nan marasokan katanangan
Kadamaien kapuasan hiduik bagi manusia
Nan dikatokan cupak tiruan
Kahandak jo kainginan untuak kagumbiraan
Sabagian hiduik manusia
Nan dikatokan cupak nan piawai
Suatu mukasuik bausaho nan mandatangkan
Faedah dan hasil bagi hiduik manusia

Cupak usali anam bagian
Partamo dakwa jo jawab
Kaduo sahadaik jo bainah
Katigo hukum
Kaampek hakim
Kalimo kadi
Kaanam bana

Cupak buetan anam pulo bagian
Paratamo adaik
Kaduo syarak
Katigo adaik nan kawi
Ka-ampek syarak nan lazim
Kalimo undang nan ditantukan
Ka-anam cupak nan balapak

Cupak tiruan ampek bagian
Partamo pakaian nan rancak
Kaduo paralatan pamainan
Katigo pakakeh alaik kagumbiraan
Kaampek istri nan baiak

Cupak nan piawai ampek pulo bagiannyo
Partamo batanam nan bapucuak
Kaduo bacupak bagantang
Katigo minum jo makan
Ka-ampek muluik manih baso katuju

Disadur dari buku "Kato Pusako"
andreandhika - 09/11/2009 01:22 PM
#90

Kato Pusako (9) Hiduik Marantau

Spoiler for Isi

Karatau madang di hulu
Babuah babungo balun
Marantau bujang daulu
Dirumah baguno balun

Tinggi malanjuiklah oi batang
Kijang barandam maelo tali
Tingga lanjuiklah oi kampuang
Bujang bajalan hanyo lai

Talang dipancuang ditugakan
Batang nan lunak dipatipih
Sayang dikampuang ditinggakan
Sayang dianak dipatangih

Tangsi curup muaro aman
limpapeh hinggok dilantai
Bundo kanduang tagiahkan iman
Malapeh anak bujang marasai

Sikujue jo batang kapeh
Kambanglah bungo parauiktan
Kalau mujue mandeh malapeh
Bak ayam pulang kapauiktan

Bukik putuih rimbo kaluang
Dirandang jaguang ditarehkan padi
Tikaik putuih nak batulang
Dipandang gunuang dikarehkan hati

Karatau disangko madang
Saenggan panangguang padi
Marantau disangko sanang
Maninggakan kampuang barisau hati
Mancarikan paruik tak baris
Mancarikan pungguang tak basaok
Mancarikan kapalo tak batutuik

Disangko murah batimbakau
mancik maampai pulo
Disangko mudah pai marantau
Basakik sakik marasai pulo

Dek ameh sagalo kameh
Dek padi mangko manjadi
Hiduik dirantau taraso lameh
Dek marasai satiok hari

Kok jadi pai ka pakan
Ikan bali balanak bali
Ikan panjang bali daulu
Kok jadi pai bajalan
Sanak cari dunsanak cari
Induak samang cari daulu

Kalo pandai bakain panjang
Labiah pado bakain saruang
Kok pandai bainduak samang
Labiah pado bainduak kanduang

Kurai taji pakan sinayan
urang tuo manggaleh lado
Capek kaki ringan tangan
Namun salero lapeh juo

Padang panjang jo pariaman
Ka ulakan di pauah kamba
Manurun kakapalo koto
Ka kida ka ujuang gunuang
Ka malalak dari sicincin
Bujang kok iyo pai bajalan
Maharok kami nan tingga
Sungguahlah jauah dari mato
Dikana juo kami dikampuang
Kok indak dilahie didalam batin

Laguah lagah bunyi padati
Jan sampai titian patah
Elok elok dirantau urang
Jan sampai bauek salah

Babelok belok pantau baranang
Bajipang batang mangkudu
Elok elok dirantau urang
Jan pulang mambuek malu

Pitalah rami balainyo
Urang sumpu manjua lapiak
Sasuku gulo sakati
Tanah sabingkah alah bapunyo
Rumpuik sahalai alah bamiliak
Malu nan balun dibagi

Manjilih ditapi aie
Maradeso diparuik kanyang
Hilang bangso indak ba ameh
Hilang rono dek panyakik
Kain palinduang miang
pitih panyaok malu

Habih miang dek bagisie
Habih malu dek biaso

Indak alu sagadang iko
Alu talatak ditabiang
Indak malu sagadang iko
Arang tacoreang dikaniang

Manyauik di hilie hilie
Kok bakto dibawah bawah
Kok manyuruak bungkuak
Kok malompek patah
Pai kakandang kambiang mangembek
Pai kakandang jawi mamemeh
Pai kakandang harimau mangaum

Rao rao sasudah panti
Painan jo taluak kabuang
Dimano bumi dipijak
disinan pulo langik dijunjuang

Ngalau dibaliak tapian mandi
Ateh kandih pandan tajelo
Kalo tak baiek bamain budi
Ameh habih badan binaso

Barakik rakik ka hulu
Baranang ranang ka tapian
Basakik sakik daulu
Basanang sanang kamudian

Barakik baranang kompang
Batu hampa ambiak ka panto
Basakik dulu mangko ka sanang
Baitu pitua niniak kito
Marunduak lalu ka pakan
Manyiluduak sambia balari
Tatumbuak biduak dikelokkan
Tatumbuak kato dipikiri

Tagaliciak batang tabu
Tagulimang baro dadak
Taguliciak tampek lalu
Dialiah pulo tampaik tagak

Kalek buah marapalam
Ambiak mako dimakan
Sasek diujuang jalan
Baliak ka pangka jalan

Kalauik jalan ka ilie
Naiak kapa balaie
Takuik diujuang badie
Lari kapangka badie

Surau di ulak aie bangih
Tonggak nan dari muko muko
Pikie daulu baru bangih
Tantukan lapa maananyo

Ukie baukie saruang padang
Simpai dulu mangko dipaluik
Bao bapikie duduak surang
Raso kakanai ganjue suruik

Bapueh pueh dek mamiliah
Bapayah payah dek mangumpai
abih dayo badan talatak
Abih paham aka baranti
Usaho mamiliah untuak mayudahi

Laka jo dulang dalam lubuak
Sasah tali barendo bukan
Aka hilang paham tatumbuak
Basarah diri pado Tuhan

Badamtam badie rang mudiak
Timbalan badie rang jao
Bialah bansaik asa cadiak
Talawan dunie urang kayo

Taraok tali alang alang
cabiak karateh tantang bingkai
Hiduik ndak usah mangapalang
Indak kayo barani pakai

Singkarak kotonyo tinggi
Sumaniak mandadok dulang
Awan bararak ditangisi
Badan jauah dirantau urang

Tanjuang alam di ampek angkek
Dari gaduik pai kakurai
Jauah bajalan banyak diliek
Lamo hiduik banyak dirasai

Baduri duri batang manau
Salaronyo babuangan juo
Satinggi tinggi tabang bangau
Inggoknyo kakubangan juo

Sakanyang kanyang bantiang
Rumpuiknyo dimamah juo
Sajauah jauah malantiang
Suruiknyo ka tanah juo

Hujan ameh dinagari urang
Hujan batu dinagari awak
Taraso sanang dirantau urang
Kampuang jauah salalu nampak

Kok anak pai marantau
Kok mandi dibawah bawah
Kok manimbo di hilie hilie
Tapi kok dialiah urang lantak pasupandan
Ditutuik urang banda sawah
Busuangkan dado ang buyuang
Paliekkan tando laki laki
Jan takuik tanah katasirah
aso hilang duo tabilang
Sabalun aja bapantang mati
Namun dalam kabanaran
Walau dipancuang lihie putuih
Satapak pun jan namuahsuruik.

Disadur dari buku "Kato Pusako"
andreandhika - 09/11/2009 01:25 PM
#91

Kato Pusako (10) Tujuan Hiduik

Spoiler for Isi

Pulai batingkek naiak
Maninggikan rueh jo buku
Manusia bapangkek turun
Maninggakan adaik jo limbago

Hiduik balingkuang adaik
Mati balingkuang tanah
Hiduik untuak mati
Dunie untuak akiraik

Hiduik baraka
Mati bariman
Hiduik bakarilaan
Mati batungkek budi

Gadjah mati maninggakan gadiang
Harimau mati maninggakan balang
Manusia mati maninggakan jaso

Dari rumbai ka mandahiliang
Sungai rokan aie nya tanang
Disamai baniah sakatidiang
Hasia padinyo sarangkiang

Bumi sanang padi manjadi
Padi diladang lah manguniang
Padi disawah alah masak pulo
Rangkiang panuah dek isinyo

Katapi bagantang urai
Katangah bagantang pudi
Bapak kayo mande batuah
Mamak disambah urang pulo

Bulek aie dek pambuluah
Bulek kato dek mupakaik
Aie batitisan batuang
Manusia batitisan bana

Manusia tahan kieh
Binantang tahan palu
Hiduik tampek basudah
Mati tampek bakubue
Kalabihan manusia 12 macam
Partamo suko maagiah makan isi nagari
Kaduo kasiah pado nan baiak banci ka nan jahek
Katigo banyak baharato bando
Kaampek banyak ilmu pangajaran
Kalimo suko hati ka urang banyak
Kaanam banyak usaho jo karajo
Katujuah indak suko jo ka upek puji
Kasalapan pangasiah panyayang pado manusia
Kasambilan pasiah lidah
Kasapuluah pandai bicaro
Kasabaleh tahu di nan bana
Kaduo baleh mangarati jo kato kiasan

Pitaruah Parpatiah nan Sabatang salapan macam
Partamo kasiah jo cinto ka nagari
Kaduo kasiah pado isi nagari
Katigo suko kapado urang barado
Kaampek kasiah kapado urang tuo tuo
Kalimo kasiah pado urang cadiak pandai
Kaanam kasiah pado pamimpin
Katujuah kasiah pado panghulu nan bana
Kasalapan kasiah pado pandapek urang

Mati batungkek budi
Hiduik bakarilaan
Ditimbang jo aka budi
Dipakai raso jo pareso
Ditimbang jo nyao badan

Disadur dari buku "Kato Pusako"
andreandhika - 09/11/2009 02:13 PM
#92

Kato Pusako (11) Babaso Basi (Sopan Santun)

Spoiler for Isi

Randah bilang-bilang disuruak-i
Tinggi kayu aro dilangkahi
ketek banamo gadang bagala
Manyuruak bungkuak, malompek patah

pai jo rundingan, tingga jo mupakaik
Bapailah batinggalah
nan capek tibo dahulu
Nan lambek datang kudian

Muluik manih kucindan murah
Kato dahulu basitinah
Kato kudian basicapek

Indak nan sirah salain kundi
Indak nan bulek salain sago
Indak nan indah salain budi
Indak nan elok salain baso
Budi haluih bak lauik dalam
Muluik manih baso katuju

Nan kuriak kundi
Nan merah sago
Nan baiak budi
Nan indah baso

Cinto kaadaik jo limbago
Mamuliekan sagalo janji
Ilimu banyak pangatahuan dalam
Bak bataburan bintang di langik
Sabanyak kasiak di pantai
Sadalam aie di lautan

Tunduak jo sujuik pado Allah
Maikuik sagalo parentah Tuhan
Samparono iman jo Islamnyo
Malangko-i sari'aik jo rukunnyo

Pandai baliku di nan tarang
Pandai balinduang di nan paneh
Pandai maambiak patangahan
Pandai maagak maagiahkan
Dibaliak-baliak mangko dibalah

Talangkang carano kaco
badarai carano kendi
Padi nan samo digantangkan
Bacanggang karano baso
Bacarai karano budi
Itu nan samo dipantangkan

Ilimu padi nan dipakai
Makin barisi makin runduak
Bagaue barandah hati
Muluik manih kuncindan murah budi haluih baso katuju
Pandai manyasuaikan pagaulan
Indak ditinggi dirandahkan
Nan tuo dipamuliekan
Samo gadang lawan baiyo
Nan ketek dikasiahi

Dibagak urang kito tak ganta
Karano kito indak pacakak
Dikayo urang kito tak sagan
Karano kito indak mamintak
Dipandai urang kito tak ka batanyo
Karano kito tak ka baguru

Dipangkek urang kito tak malu
Karano kito indak mintak karajo
Dikuaso urang kito tak patuah
Karano kito bukan pisuruah
Dibudi jo baso basi sajo kito nan tunduak

Elok parangai duduak tagak
bataratik minum jo makan
Tabaokan sopan santunnyo
Anggoto nan tujuah dipagunokan

Jiko pai kaparalek-an
Duduak tagak ado jangkonyo
Baso jo basi usahlah lupo
Nan tuo didahulukan
Samo gadang dipabasokan

Kok sairiang jo nan tuo
Usah malangkah mandahului
Jiko Bagageh dek takaja
Mintak maaf jo karilaan
Mintak tabiak, nak dahulu

Kok duduak di nan tinggi
Sugirolah capek tagak badiri
Mintak baganti tampek duduak
Eloknyo nan tuo nan di ateh

Kok samo makan jo nan tuo
Tunggu dahulu basuah tangan
Kalo dahulu nak sudah makan
Nantikan salasai nan tuo-tuo

Duduak makan jan mancangkuang
Duduak baselo elok-elok
Suok nasi dipaketek
Mangunyah jan mancapak
Jan mangecek sadang makan

Kalo taraso nak mandaham
Paliangkan muko ka balakang
Makan jan banyak-banyak
Napsu paralu dibatehi

Jikok makan bakawan-kawan
Kok nak dahulu salasai sudah
Mintak rila mambasuah tangan
Bao kamuko tampek basuah
Tangan nan jan dicabuakkan
Toyong ka piriang mambasuahnyo
Jari nan jan digalatiakkan

Kok duduak basamo jo nan tuo
Banyak rundiang nan disabuik
Banyak pitua nan didanga
Papatah patitih salo manjalo
Banyak pangaja nan kadiambiak
Dapek baraja indak baguru
Dapek pitua sadang duduak
Bak bilalang dapek di manuai
Bak dapek ikan sadang basiang

Ado pun nan disabuik parampuan
Mamacik taratik jo sopan
Tahu mamakai baso basi
Tahu di hereang sarato gendeang
Mamakaikan raso jo pareso
Manaruah malu jo sopan

Manjauahi sumbang jo salah
Muluik manih baso katuju
Kato baiak gulo di bibie
Laku elok kucindan murah

Dinan dangkek basijingkek
Di nan dalam basisalam

Hiduik bak tumo
Di kain putiah bantuaknyo putiah
Di kain hitam nampaknyo hitam

Sumber : Buku "Kato Pusako"
andreandhika - 09/11/2009 02:14 PM
#93

Kato Pusako (12) Urang

Spoiler for Isi

ado anam macam urang
Partamo urang namonyo
Kaduo urang-urang namonyo
Katigo tampan urang namonyo
Kaampek angkuah-angkuah urang namonyo
Kalimo urang-urangan namonyo
Kaanam urang sabana urang


nan dikatokan urang
Tau mambedokan antaro jahek jo indak jahek
Tau mambedokan nan tinggi jo nan randah
Dinamokan urang biaso

Nan dikatokan urang-urang
Bantuaknyo manyarupoi urang
Indak ciek juo nan dikatauinyo
Bak anak ketek nan balun tau apo-apo

Nan dikatokan tampan-tampan urang
Dicaliak jauah bantuak urang
Tantang kalakuannyo balun jaleh
Balun dapek dipicayoi atau diyakini

Nan dikatokan angkuah-angkuah urang
Urang nan kalakuannyo sarupo patuang
Hiduiknyo bak kato urang sajo
Hiduik nan indak bapandirian
Utaknyo bak utak katuang (bodoh)
Babanak kaampu kaki

Nan dikatokan urang-urangan
Bukan urang tapi dibuek manyarupoi urang
Umpamo urang-urang tangah sawah
Kalo dielo inyo mangarik
Indak dielo diam sajo

Nan dikatokan urang sabana urang
Tau di awa jo nan akie
Tau di lahie jo nan batin
Tau di hereang sarato gendeang
Tau di malu jo sopan, raso jo pareso
Urang cadiak candokio, arif bijaksano
Budinyo tinggi, ilmunyo banyak
Mamanuahi saraik martabaik manusia
Hiduiknyo manjadi contoh tuladan

Urang mudo manangguang rindu
Urang tuo manahan ragam

Urang nan ampek jinih
Partamo panghulu (andiko)
Kaduo malin (alim ulama)
Katigo manti (cadiak pandai)
Kaampek dubalang (urang mudo-mudo)

Urang nan ampek golongan
Partamo niniak mamak
Kaduo cadiak pandai
Katigo alim ulama
Kaampek bundo kanduang

Disadur dari buku "Kato Pusako"
andreandhika - 09/11/2009 02:25 PM
#94

Kato Pusako 13 : Urang Sumando

Spoiler for Isi

Banyak macamnyo urang sumando
Partamo sumando kacang miang
Kaduo sumando langau hijau
Katigo sumando kutu dapue
Kaampek sumando lapiak buruak
Kalimo sumando apak paja
Kaanam sumando niniak mamak

nan banamo sumando kacang miang
Mambao kusuik tak salasai
Mambuek karuah korong kampuang
Bumi sampik alam tak tanang
inyo manjadi upeh racun

Nan banamo sumando langau hijau
Ameh taserak di nan kalam
Intan tacicie sagadang bada
Ulek tingga inyo pun tabang
Langau pun indak hinggok lai

Nan dinamokan sumando kutu dapue
Indak bajalan hilie mudiak
Korong kampuang indak batampuah
Karib karabaik indak piduli
Namuah manumbuak jo batanak
Samaklah jalan ka tapian
Lah karam jalan ka pintu
Nan elok langkah ka dapue
Asa lai sanang bini awak
Mati ayam matilah tungau
Sadanglah dunie sarupo itu

Nan dikatokan sumando lapiak buruak
Iyolah sumando kalangkahan
Jadi ijuak panamba-namba
Pagi patang dikicuah bini
Awak kasiah bini manggendeang
Asa bini tak dapek malu
Bialah awak jadi landasan

Arti sumando apak paja
Inyo umpamo kumbang jantan
Datang rancak painyo elok
Sanjo pulang pagilah pai
Ciek tak dapek diharokkan
Pandai manggulai tak bakuah
Kanyang dek gulai ambuang-ambuang
Mabuak bamain muluik manih
Raso di tapak tangan juo

Nan dikatokan samando niniak mamak
Inyolah bumi langik kito
Kaganti cincin kaganti galang
Payuang panji tampek balinduang
Kaganti sitawa jo sidingin
Panjang bakarek singkek bauleh
Elok budi lauik bicaro
Paham elok baso katuju
Rumah tanggo aman santoso
Lahie batin indak bakaupek-an

Caro mancari urang sumando
Nan asa di nagari
Dapek balinduang di taduahnyo
Dapek basanda di batangnyo
Dapek baselo di ureknyo

Disadur dari buku "Kato Pusako"
andreandhika - 09/11/2009 02:50 PM
#95

Kato Pusako (14) Pusako

Spoiler for Isi

Biriak-biriak tabang ka samak 

Dari samak tabang ka halaman 

Patah sayok tabang baranti 

Basuo di tanah bato

Dari niniak turun ka mamak 

Dari mamak ka kamanakan 

Patah tumbuah hilang baganti 

Pusako lamo baitu juo

adaik malingka pusako marungguah
Suarang dibagi pusako dibalah 

Sako indak dapek disako-i

Pusako buliah dipusako-i

Kok tasasak ikan ka ampang 

Lah tasasak kijang ka rimbo 

Indak dapek batenggang lai 

Tak bakayu janjang dikapiang 

Tak babareh atah digisiak

Kok tak baameh bungka diasah 

Tak ado aie talang dipancuang 

Guno harato pandindiang malu

Ampek alasan pusako dijua atau digadai 

Partamo untuak pambangkik batang tarandam 

Kaduo karano rumah gadang katirisan 

Katigo gadih gadang alun basuami 

Kaampek maik tabujue tangah rumah

Ado tigo macam nan dipusako-i 

Partamo pusako

Kaduo sako 

Katigo sangsako

Nan dikatokan pusako

Miliak nan barupo sawah ladang ameh perak paninggalan urang tuo-tuo atau dari niniak muyang 

Nan dikatokan sako 

Iyolah gala pusako nan ditarimo turun-tamuruit manuruik garih turunan ibu

Nan dikatokan sangsako

Iyolah gala jabatan dalam adaik, umpamo gala katik, imam, bila, pakiah labai dan lain-laio

Ado tigo macam pusako 

Partamo pusako guntuang 

Kaduo pusako randah 

Katigo pusako tinggi

Nan dikatokan pusako guntuang 

Pusako dari kaum nan lah punah 

Nan dikatokan pusako randah 

Pusako nan ditinggakan untuak diwarisi 

Nan dikatokan pusako tinggi

Pusako Tambilang basi niniak muyang

Duo macam pusako tambilang 

Partamo pusako tambilang basi 

Kaduo pusako tambilang ameh

Nan dinamokan pusako tambilang basi 

Cancang latiah tarukoan niniak muyang diwarihkan hanyo untuak pasukuan
Nan dinamokan pusako tambilang ameh 

Pusako pambalian usaho induak bapak, kalo tak ado katurunan padusi buliah diwarihkan ka anak minantu

Warih bajawek, pusako ditoloang 

Harato pusako dipaliharo 

Sumbiang dititiak, hilang bacari 

Kurang ditukuak, patah batimpo 

Runtuah dinaiakkan, rusak dipabaiaki

Sako turun tamurun 

Pusako jawek bajawek 

Nan salingkuang cupak adaik 

Nan sapayuang sapatagak

Sumber : Buku "Kato Pusako"
andreandhika - 09/11/2009 02:52 PM
#96

Kato Pusako 15 : Kiaik Bausaho

Spoiler for Isi

Ka rimbo babungo kayu
Ka sawah babungo padi
Ka lauik babungo karang
Ka tambang babungo ameh
Ka sungai babungo pasie

Didulang ameh di sungai
Ditambang ameh jo perak
Ditaruko gurun jo bancah
Dilambeh hutan jo baluka
Dirambah samak rimbo dalam
Dilambang bumi tanah subua
Dibuek sawah satampang baniah
Makanan urang tigo luhak



Ka ladang di hulu tahun
Ka sawah di pangka musim
Hasie banyak karano jariah
Hasie buliah karano pandai

Lauik dalam buliah diajuak
Bumi laweh dapek digali
Bukik dapek diruntuah
Asa bajariah bausaho

Lauik ditimbo lai kakariang
Gunuang diruntuah mungkin data
Sadang dek samuik runtuah tabiang
Apolai dek manusia nan baraka

Nak mamakan isi durian
Nak mandapek manisan labah
Sakik sanang paralu dirasai
Sapayah-payah badan
Namun nan labo jan ditinggakan

Satitiak-satitiak manjadi lauik
Sakapa-sakapa manjadi gunuang
Sahari sahalai banang
Lamo-kalamoan manjadi sahalai kain

Padi dikabek jo daunnyo
Batang ditungkek jo dahannyo
Hutang lansai dek babaie
ketek utang dek angsuran
Hulu baiek pandai batenggang
Hulu malang salah galogok
Apo ditanam namuah tumbuah
Bijo ditanam ka babuah
Batang ditanam kabarisi
Batanam nan bapucuak
Mamaliharo nan banyao

Dibuek banda baliku
Tibo di bukik digali
Tibo di batu dipaek
Tibo di batang dikabuang

Nan ganang palapeh ikan
Baluka tampek taranak
Nan lunak ditanam baniah
Nan kareh dibuek ladang
Sawah batumpak di nan data
Ladang babidang di nan lereang

Nan lurah tanami bambu
Nan lereang tanami tabu
Nan padek kaparumahan
Nan gurun buek kaparak
Nan bancah dibuek sawah
Nan munggu kapakubuaran
Nan gauang katabek ikan
Nan padang kapaimpauan
Nan lambah kubangan kabau
Nan rawang payo kaparanangan itiak

Kok sawah bapiriang-piriang
Kok ladang babidang-bidang
Banda baliku turuik bukik
Sawah lah sudah jo lantaknyo
Ladang lah sudah jo ranjinyo

Jikok tanah lah bakabuang
Jikok rimbo bajiluang
Kok lunak balantak
Kok kareh baparik
Sawah bapiriang
Ladang babintalak

Babuah kayu punago
Sikujue dalam sukatan
Batuah rumah andiko
Lai mujue bapandapatan

Dari Rumbai ka Mandahiliang
Sungai Rokan aienyo tanang
Manyamai baniah sakatidiang
Hasie padinyo sarangkiang

Asalai jio-jio patuang
Asalai angok-angok ikan
Nan indak dicari juo
Dibaliak-baliak mangko dibalah

Elok erak wakatu paneh
Elok lenggang di nan data
Elok tanaman dek basiang
Gadang tanaman dek bapupuak
Rancak tanaman dek balambuak

Dek disiang padi manjadi
Dek dilambuak tanaman elok
Dek pupuak makonyo subua
Dek aie tanaman tumbuah

Hari sahari dipatigo
Malam samalam diparampek
Agak agiah jo ilimu
Himaik dulu
Bahimaik kamudian

Nak kayo badikik-dikik
Himaik pangka kayo
Bakulimaik sabalun habih
Caba pangka cilako
Nak kayo kuaik mancari
Nak balabo bueklah rugi
Namuah bajariah bausaho
Indak mamandang jauah dakek

Rugi manantang buliah
Jariah manantang labo
bajalan baaleh tapak
Bakato baaleh lidah

Suligi tajam baliak batimba
Tak ujuang pangka manganai
Sakali mambukak puro
Duo tigo utang tabaie
Sakali mandayuang biduak
Duo tigo pulau talampau

Mangabek sakabek arek
Malangkah salangkah sampai
Bakato sapatah sadang


Pariuak barehlah tajarang
Tajarang di tungku tigo
Samangkuak aie lah sadang
Sakarek kayu lah pado

Sambie manyalam minum aie
Sambie badiang nasi masak
Sambie badayuang biduak hilie
Ombak ditantang manuju pulau
Laie dikambang manantang angina

Hati susah makonyo sanang
Tacapai niaik jo tujuan
Dek ameh sagalo kameh
Dek padi sagalo jadi

Panuah kapuak jo padi
Tagak sumpik dek isi
Badiri adaik dek limbago
Urang kayo suko dimakan
Urang lai suko baragiah
Urang kayo mukasuik sampai
Urang lai mukasuik buliah
Niaik sampai cinto balaku

Manjilih di tapi aie
Maradeso di paruik kanyang
Baso basi dek lai ado
Minum makan paubek lapa
Nak kuaik sandi jo tulang
Nak sadonyo makasuik sampai

Barakik-rakik ka hulu
Barang-ranang ka tapian
Basugi timbakau jao
Basakik-sakik daulu
Basanang-sanang kamudian
Marugi mako balabo

alang tingginyo batang anau
Bakulipak baijuak pulo
Alang basakik batimbakau
Maracik maampai pulo

Panyangek di ujuang rantiang
Tabang ka pulau Angso Duo
kasiak Angek pingganglah gantiang
Namun Pukek dielo juo


Indak dapek dunie dihadang
Indak akiraik katacapai
Kok indak jo jariah jo usaho
Samo bapokok babalanjo
Samo bajariah bausaho
surang jo pokok babalanjo

Bausaho mancari hiduik
Sambie mamikek paluah buruak
Nak sihaik pulo batang tubuah
Nak elok pulo adaik dipakai

Diasah padang nan panjang
Alaik pakakeh dipatajam
Dilateh baluka nan kariang
Diparun samak nan masiak
Dielo karajo jo usaho
diirik parang jo barani
Urang nan banyak manuruik-i

Indak silasiah nan babungo
Antah kok bayam di halaman
Jarang manusia mambaleh guno
Antah kok hasie tanam-tanaman

Tagaliciak batang tabu
Tagulimang baro dadak
Tagaliciak tampek lalu
Dialiah pulo tampek tagak

Bapueh-pueh dek mamiliah
Bapayah-payah dek mangumpue
abih dayo badan talatak
Abih paham aka baranti
Usaho mamiliah
Untuang manyudahi

Laka jo dulang dalam lubuak
Pandan baduri malendo jalan
Aka hilang paham tatumbuak
Basarah diri pado Tuhan

Disadur dari buku "Kato Pusako"
andreandhika - 09/11/2009 03:35 PM
#97

Kato Pusako 16 : Kato Bag.1

Spoiler for Isi

Anggang tabang bamangkuto
Rajo bajalan badaulaik
alang sariknyo bakato-kato
Tiok kato baalamaik

Tahu dihereang jo gendeang
Tahu diraso jo pareso
Tahu dikilek jo bayang
Tahu dialamaik kato sampai
Tahu digelek kato habih
Tahu di dahan kamaimpok
Tahu di duri kamancucuak

Malangkah di ujuang padang
Basilek di pangka karih
Kato salalu baumpamo
Rundiang salalu bakiasan

Kato rajo kato malimpahan
Kato panghulu kato manyalasai
Kato malin kato hakikaik
Kato guru kato pangaja
Kato manti kato bahubuang
Kato dubalang kato mandareh
Kato dagang kato mamacah
Kato parampuan kato marandah
Kato urang banyak kato bagalau

Kato nan ampek
Partamo kato pusako
Kaduo kato mupakaik
Katigo kato dahulu batapek-i
Kaampek kato kudian kato bacari

Kato pusako adolah asanyo dari niniak Katumangguangan jo niniak
Parpatiah
nan Sabatang sarato jo niniak nan cadiak pandai maso tu sasuai manuruik
adaik jo syarak
Kato mupakaik adolah kato nan datang dari musyawarah sagalo Panghulu jo
cadiak pandai jo urang tuo-tuo ahli aka dalam suatu nagari
Kato dahulu batapek-i adolah kato Kaputusan nan lah ditatapkan sabalun
jo
sasudah niniak Katumangguangan jo niniak Parpatiah nan Sabatang
Kato kudian kato bacari adolah kaputusan kato nan ditantukan
sabalunnyo,
tapi karano tajadi panyimpangan tak sesuai jo kaputusan samulo,
dicarikan
panyalasaiennyo sasuai jo panyimpangan tu, ditatapkan pulo dek
kasapakatan
basamo

Lagam kato
Partamo kato mandaki
Kaduo kato mandata
Katigo kato malereang
Kaampek kato manurun
Nan dikatokan kato mandaki
Babahaso nan disampaikan ka lawan bicaro urang nan tuo-tuo jo nan
sangaik
dihormati
Nan dikatokan kato mandata
Babahaso nan disampaikan ka lawan bicaro nan saumuenyo
Nan dikatokan kato malereang
Babahaso nan disampaikan ka lawan bicaro nan disagani dalam pagaulan
Nan dikatokan kato manurun
Babahaso nan disampaikan ka lawan bicaro nan umuenyo mudo atau di bawah
umue

Bulek kato di mupakaik
Bulek aie dek pambuluah
Baiak diambiak jo mupakaik
Buruak dibuang jo etongan
Baiak kato dalam mupakaik
Buruak kato indak sapakaik

Adaik basandi syarak
Syarak basandi kitabullah
Syarak mangato adaik mamakai
Ujuik satu balain jalan

Kato surang dibulek-i
Kato basamo dipaiyokan
Kato batin dimaklumi
Kato rang mudo basimanih
Kato iyo kato baturuik


Kato nan sabana kato
Kato tuladan
Kato nan dikatokan
Kato bakatai-katai
Nan dikatokan kato nan sabana kato adolah kato nan sabalunnyo
dipikiekan
dulu kaluanyo
Nan dikatokan kato tuladan iyolah kato nan dipakai, contohnyo diambiak
dari
kejadian pado urang lain
Nan dikatokan kato nan dikatokan iyolah kato nan indak disangajo,
disampaikan sacaro kabatulan sajo
Nan dikatokan kato bakatai-katai iyolah kato asa kalua sajo, indak
paralu
dihiraukan

Bilo kato Iah ditanam di hati
Jalehlah sagalo rahasio alam
Jikok diajun si Tambo lamo
Sabarih indak buliah hilang
Satitiak bapantang lupo

Sangaik lahienyo tasambunyi
Sangaik batinnyo kaliektan
Bilo nan hilang lai kadicari
Pusako lamo Jai nan kamanganakan

Tagak diambuang ambuang
Malangkah di ujuang karih
Bakato di ujuang lidah

Kok bakato elok marandah
Lamak di lua kuaik di dalam
Muluik manih kucindan murah
Muko janiah indak pandandam

Bajalan salangkah maelo suruik
Bakato sabuah dipikiri

Mangaie baumpan, bakato batipuan
Malantiang manuju tampuak
Bakato manuju bana

Mangabek sakabek arek
Malangkah salangkah sampai
Bakato sapatah sadang

Awak nan tak pandai badandan
Dikatokan camin nan buruak
Awak nan tak pandai manari
Dikatokan lantai nan tajungkek

Capek tangan tajombokan
Capek kaki talangkahkan
Capek muncuang takatokan

Elok-elok manyusun kato
Mato musuah, kaki musuah
Tangan pun musuahjuo
Kato nan singa-singa lancang

Bulek kato di pangkanyo
Pacah kato di ujuangnyo
Kato dahulu batapati
Kato kudian kato bacari
Kato lahie jadi batin Baiak kato dibaiki
Elok kato dipakatokan
Sio-sio kato basikareh
Tadoroang kato di tangah medan
Indak dapek diganjue suruik
Kato suruik mambuek malu

Dari Malako ka Suliki
Payokumbuah Koto nan Gadang
Baparak tabu satumpak
Basuo kato mandaki
Dari nan ketek ka nan gadang
Dari anak ka ibu bapak

Bajalan paliharo kaki
Bakato paliharo lidah
Elok kato dalam mupakaik
Buruak kato mangecek surang
Kato dahulu basitinah
Kato kudian basicapek
Nan boneh nan kadikatokan
Kato bajawab gayuang basambuik
Talonsoang parahu dapek babaliak
Talonsoang kato bakataruihan
Tatumbuak biduak dikelokkan
Tatumbuak kato dipikiri

Duduak dagang
Tagak dagang
Bakato dagang sakali

Ilimu kato ampek macamnyo
Partamo kato sama
Kaduo kato sadiak
Katigo kato bungkuak bana
Kaampek kato kurenah

Nan dikatokan kato sama
Kato baiak nan dipabaiaki
Binaso kato jikok dibinasokan
Sah kato jikok disahkan
Haruih kato jikok diharuihkan
Kato nan ditarimo indak salamonyo tatap diharuihkan
Kato syarak atau kato adaik ado duo tampeknyo
Di tampek salah atau di tampek bana

Nan dikatokan kato sadiak tamasuak kato bana juo
Dikuasoi manuruik syarak atau manuruik adaik kadang mancapai kamuliean
ado
kalonyo sampai pado mukasuiknyo sajo
Nan dikatokan kato bungkuak bana ado duo tampeknyo
Ado nan sadiak bantuaknyo bana untuak suatu usaho, tapi digunokannyo
untuak
kaparaluan surang
Nan dikatokan kato kurenah
Banyak curito pangalaman nan dilieknyo atau dipadapek dari nan tuo-tuo
dahulunyo, jikok ado usaho nan bafaedah untuak dirinyo, ingin
maambiaknyo
untuak mancapai sagalo mukasuiknyo
Indak marugikan urang lain, nan paralu dirinyo sanang

Martabaik kato tigo bagian
Partamo kato mancari kawan
Kaduo kato mancari lawan
Katigo kato indak balawan
andreandhika - 09/11/2009 03:41 PM
#98

Kato Pusako 16 : Kato Bag.2

Spoiler for Isi

Kato mancari kawan
Adolah kato maambiak hati urang walau jo ameh atau perak sakalipun
Kato mancari lawan
Kato indak maambiak hati urang buruak baiak kalua sajo kasudahannyo
jadi
parmusuhan
Kato Indak balawan kato mamaliharo diri kato mamaliharo hati urang

Tiok kato dipikiekan kaluanyo
Baiak tantang adaik
Baiak tantang syarak
Baitulah kato nan kadipakai

Kato nan bana adolah kato nan bapatutan, tabaokan taratiknyo budi
bahasonyo,
sopan santunnyo

Panyalasaian kato ampek macamnyo
Partamo disudi
Kaduo disiasati
Katigo disusuli
Kaampek diparesoi

Nan dikatokan disudi, mananyokan sasuatu nan balun jaleh manjadi jaleh
Nan dikatokan disiasati, mananyokan sasuatu dahulu jaleh, kasudahannyo
indak
jaleh (ragu)
Nan dikatokan disusuli, mananyokan sasuatu dari ujuang sampai ka pangka
Nan dikatokan diparesoi, mananyokan sasuatu dari pangka sarnpai ka
ujuangnyo

Mardeso kato jo rnupakaik
Baiak tantang syarak sakalipun

Asa kato bagi urang nan baraka duo macamnyo
Partamo didapek dari baguru
Kaduo didapek dari pikiran sandiri

Kato tantang aka budi anam baleh macamnyo dibagi duo manjadi salapan
Salapan
partamo
Partamo sidiak
Kaduo midiak
Katigo cadiak
Kaampek arih
Kalimo candokio
Kaanam gudiman
Katujuah jauhari
Kasalapan bijaksano

Salapan kaduo
Partamo Mada
Kaduo saba
Katigo tawaka
Kaampek sudaga
Kalimo sadiak
Kaanam kurenah
Katujuah sama
Kasalapan bungkuak bana

Sidiak aratinyo pasangketoan, nak malalukan kainginan sandiri tahadok
urang
banyak, supayo tacapai mukasuiknyo, timbuelah nan dikatokan taraju nan
indak
palingan, rabah banang, tagak banang namonyo

Midiak aratinyo manuju jalan nan bana, walau caro basungguah-sungguah
disalahkan juo Lakunyo indak namuah takanai, baiak tantang syarak atau
ilimu
dunie, inyo maliek pulo di baliak nan tampak

Cadiak aratinyo ado kainginan, tapi niaik salah, di hatinyo nak maniayo
urang lain, asa kauntuangan dapek di dirinyo, indak piduli urang rugi,
indak
namuah takanai, mako jadi kabancian urang lah inyo

Candokio, anggan takanai, kuaik ingatannyo, taguah pagangannyo, tak
namuah
manyingguang karano takuik taniayo
Ado duo macam candakio ateh kasumaik, partamo nan jahek, kaduo nan
baiak,
jadinyo candakio tu artinyo sudaga

Arih aratinyo tahu dikarajo urang, cuma lakunyo pancimburu, cameh jikok
tapadayo, jadi kasimpulannyo sudaga juo, papatahnyo kurang arih badan
cilako, talampau arih badan binaso

Gudiman aratinyo salalu ingek ka dirinyo, ka anak kamanakannyo, saisi
rumahnyo, ka nan sakampuang sahalaman jo aka budinyo.

Jauhari aratinyo urang nan tahu di macam jo harago, pandai manimbang
makasuik kato urang untuak dirinyo, baiak nan batujuan buruak atau
jahek
Itulah mako jauhari aratinyo rajo

Bijaksano aratinyo urang nan tahu jo nan baiak jo nan jahek, jikok
manjawab
kato urang mudah sarato capek, tahu caro mancari jalan maminteh, dapek
mandahului mukasuik lawannyo
Makonyo bijaksano dikatokan juo kadi

Mada aratinyo sipaiknyo bak batu, walau diabuih indak kaampuak, samo jo
banang hitam, baa jo rnambasuahnyo indak ka namuah putiah, indak
mamparatikan baiak nan syarak, baiak nan adaik, indak namuah baiyo
batido jo
urang lain, malakukan kahandak hati surang sajo

Saba adolah induak sagalo aka, karano aka tu manjalani mudarat jo
mupaat
Urang nan saba kasihan Allah
Walau dalam hiduiknyo basuo nan indak bana tahadap dirinyo tak panah
inyo
susah hati

Tawaka aratinyo sagalo sasuatu dalam hiduiknyo basarah diri pado nan
Maha
Kuaso, apo nan tibo pasrah manarimonyo, salalu bahagia dalam hiduiknyo,
hiduik salalu dalam kapuasan, baiak lahie maupun batin
Hiduik nan samparono

Sudaga aratinyo urang pandai babicaro untuak kauntungan dirinyo,
kaumnyo jan
sampai taniayo, tujuannyo kauntungan samato, baiak nan nyato baiak nan
indak
nyato

Ado duo pambagian kato
Partamo kato asa
Kaduo kato usue

Tambahan pambagian kato
Parmulaan, kasudahan, puhun, cawang, hakikat, mujijat, lahie, batin,
khusus,
umum jo nan nyato

Adapun sagalo kato mampunyai pulo
Partamo aka kato
Kaduo pangka kato
Katigo batang kato
Kaampek dahan kato
Kalimo cabang kato
Kaanam rantiang kato
Katujuah daun kato
Kasalapan bungo kato

Adopun hati manusia itu nan dikatokan bijo kato
Dalam adaik kato ado tigo macamnyo
Partamo kato mukabilah
Kaduo kato bahelah
Katigo kato bakilah

Nan dikatokan kato mukabilah
Kato dalam adaik yaitu rundiang oan saiyo, bana nan saukue
Bak batang dalam tanah, tigo puluah tahun tabanam dalam lunau, namun
tareh
mambangunjuo
Bak ibaraik bungo piriang, walau pacah baserak, tujuah musim di dalam
tanah,
namun raginyo indak kahilang

Kato kabanaran nan indak dapek diubah, indak dapek dituka, kato nan hak
nan
haruih dihayati dek niniak mamak sarato pamimpin dalam nagari, kato nan
musti ditagakkan, dituruti

Nan dikatokan kato bahelah
Kato urang lain nan bantuaknyo bana, barih luruih jalan tarantang,
paham bak
api dalam sakam, di lahie indak mangasan, lah hanguih sajo mako tahu,
kato
nan salalu bakelah, lari dari kabanaran, katonyo inyo nan bana, nan
lain
indak bana

Nan dikatokan kato bakilah
Kato nan indak dapek dipadomani atau dipacik arek karano maambiak
contoh
ateh kabanaran urang lain, kato nan batue manuruik sapihak sajo, karano
katonyo sajo nan bana, indak dapek dibantah, karano bodoh

Putuih gayuang di balabeh
Putuih kato di pangkanyo

Manuruik sapanjang adaik
Di mano anjiang manyalak
Di sinan biawak tajun
Di mano kato bamulai
Di sinan pulo disudahi

Kalo ado jarum nan patah
Usah dilatak dalam padi
Dilatak sajo di pamatang

Buliah pancukie-cukie duri
Kalo ado kato nan salah
Usah dilatak dalam ati
Latakkan sajo di balakang
Usah menjadi upek puji

Disadur dari buku "Kato Pusako"
andreandhika - 09/11/2009 03:48 PM
#99

Kato Pusako (17) Hiduik Mautamokan Budi

Spoiler for Isi

nan kuriak iyolah kundi
Nan sirah iyolah sago
Nan baiak iyolah budi
Nan indah iyolah baso

Indak nan bulek salain kundi
Indak nan sirah salain sago
lndak nan indah salain budi
Indak nan elok salain baso

Mati batungkek budi
Hiduik bakarilaan
Tiok katuak baundang-undang
Tiok karuik budi marangkak

Ditimbang jo aka budi
Dipakai raso pareso
Ditimbang jo nyao badan

Kuaik rumah karano sandi
Rusak sandi rumah binaso
Kuaik bangso karano budi
Rusak budi hancuelah bangso

Budi jan tajua
Paham jan tagadai
Kok kayo, kayo dek budi
Nak mulie, mulie dek baso
Budi nan indak katinjauan
Paham nan indak kamaliangan

Banyak cinto marisau ragu
Budi manunggu jo ilimu
Paham babisiak dalam batin

Budi tak namuah tajua
Paham tak namuah tagadai
Ditiliak jo aka budi
Muluik manih baso katuju
Budi haluih bak lauik dalam

Anak ikan dimakan ikan
Ikan tanggiri di dalam lauik
Sanak bukan famili bukan
Karano budi basangkuik pauik

Anak ikan dimakan ikan
Gadang ditabek anak gurami
Ameh bukan pangkek pun bukan
Budi sabuah nan urang cari

Anak nalayan mambao pangkue
Ditanam ubi di tanah darek
Baban sakoyan dapek dipikue
Budi saketek taraso barek

Ka puncak barangin-angin
Babelok jalan ka kiri
Dilagak urang tak ingin
Budi nan baiak nan dicari

Sarikayo jo sari lamak
Buah rambai di dalam nyiru
Pisau sirauik latak di laci
Dikayo urang tak mintak
Dipandai urang tak baguru
Kalo hiduik indak babudi

Dibagak urang kito tak ganta
Karano kito indak pacakak
Dikayo urang kito tak sagan
Karano kito tak mamintak
Dipandai urang kito tak kabatanyo
Karano kito tak kabaguru
Dipangkek urang kito tak malu
Karano kito indak mintak karajo
Dikuaso urang kito tak patuah
Karano kito bukan pisuruah
Dibudi jo baso bast sajo, kito nan tunduak

Pisang ameh bao balaie
Masak sabuah di dalam peti
Hutang ameh dapek dibaie
Hutang budi dibao mati

Pulau Pandan jauah di tangah
Di baliak pulau Angso Duo
Hancue badan dikanduang tanah
Budi nan baiak takana juo

Kok hiduik bapaga budi
Kuaik pado bapaga basi
Kukuah pado bapaga tembok

Anggang nan datang dari lauik
Tabang sarato jo mangkuto
Dek baiak budi nan manyambuik
Pumpun kuku patah paruahnyo

Elok sairiang jo juru mudi
Elok saiyo jo sakato
Kok pandai bamain budi
Nan lia jinak jadinyo

Hiduik batungkek batang bodi
Mati bapancang di tanah sirah
Jikok pandai bamain budi
Dalam aie badan tak basah

Uraian barih jo balabeh
Hinggo durian ditakuak rajo
Supayo budi samo marateh
Usaho galian dek basamo

Ditiliak barih jo balabeh
Papatah pakaian panghulu
Supayo budi samo marateh
Nak tantu rueh jo buku

Kato guru kato batuah
Kato sudaro paringek-an
Kuncilah batin jan tacurah
Budi nan Jan kalihatan

Batang aue paantak tungku
Pangkanyo sarang sipasan
Galundi di sawah ladang
Sariak indak babungo lai
Mauleh jikok mambuku
Mambuhue kalo mangasan
Kalo budi tampak dek urang
Hiduik nan indak paguno lai

Ombak baralun manuju pantai
Riak nyato manuju tapi
Indak guno jadi rang pandai
Kalo bailimu indak babudi

Dek ribuik rabahlah padi
Dicupak datuak Tumangguang
Kalo iduik indak babudi
Duduak tagak kumari cangguang

Talangkang carano kaco
badarai carano kendi
Padi nan samo digantangkan
Bacanggang karano budi
Bacarai karano baso
Itu nan samo dipantangkan

Ngalau di baliak tapian mandi
Ateh kandih pandan tajelo
Kalo tak baiak bamain budi
Ameh habih badan binaso

Pucuak pauah sadang tajelo
Panjuluak buah galundi
Nak jauah silang sangketo
Paaluih baso tingkekkan budi

Anjalai tumbuah di munggu
Sugi-sugi di rumpun padi
Nak pandai sungguah baguru
Nak tinggi tingkekkan budi

Jariah indak manantang buliah
Manolong karano Allah

Disadur dari buku Kato Pusako
andreandhika - 09/11/2009 03:50 PM
#100

Kato Pusako 18 : Sagalo Ampek (Nan Ampek)

Spoiler for Isi

Indak tahu di ampek
Kok tak tahu di ampek
alang sariknyo mamarentah

adaik limbago nan salapan
Nan ampek tabang ka langik
aso bulan
Duo matohari
Tigo bintang
Ampek timue (fajar)

Nan ampek tingga di bumi
Rumah gadang Lumbuang baperong
Sawah gadang
Banda buetan

Adaik nan ampek
Partamo adaik nan sabana adaik
Kaduo adaik nan diadaikkan
Katigo adaik nan taradaik
Kaampek adaik istiadaik

Kato nan ampek
Partamo kato pusako
Kaduo kato mupakaik
Katigo kato dahulu kato batapek-i
Kaampek kato kudian kato bacari

Ampek macam ilimu kato
Partamo kato sama
Kaduo kato sadiak
Katigo kato bungkuak bana
Kaampek kato kurenah

Ragam kato nan ampek
Partamo kato mandaki
Kaduo kato malereang
Katigo kato mandata
Kaampek kato manurun

Ampek macam hukum kato
Partamo ditangkup (ditarimo)
Kaduo disalasaikan
Katigo dimusiah
Kaampek dibandiang

Ampek macam panyalasaien kato
Partamo disudi
Kaduo disiasati
Katigo disusuli
Kaampek dipareso-i

Undang-undang nan ampek
Partamo undang luhak rantau
Kaduo undang-undang panyusunan nagari
Katigo undang-undang urang dalam nagari
Kaampek undang-undang nan duopuluah

Ampek macam undang-undang panyusunan nagari
Partamo taratak
Kaduo dusun
Katigo koto
Kaampek nagari

Undang-undang kakuasaan nan ampek
Partamo undang-undang sagalo panghulu
Kaduo undang-undang urang tuo-tuo di nagari
Katigo undang-undang hulubalang di nagari
Kaampek undang-undang luhak pakaian sagalo panghulu atau Rajo Alam
Ampek macam hukum
Partamo hukum ilimu
Kaduo hukum bainah
Katigo hukum kurenah
Kaampek hukum ijtihaik

Ampek macam hukum ijtihaik
Partamo hukum badukalo
Kaduo hukum baramu
Katigo hukum basamo
Kaampek hukum samato

Ampek macam caro manantukan hukum
Partamo dicari jo rundiangan
Kaduo dicari manuruik adaik
Katigo dibandiang manuruik syarak
Kaampek dikaji dari awa sampai akie sarato sabab jo akibaiknyo

Ampek macam hukum buang
Partamo hukum buang siriah
Kaduo hukum buang biduak
Katigo hukum buang tingkarang
Kaampek hukum buang daki

Ampek macam jalannyo dakwa
Partamo karano tacemo
Kaduo karano disapokan
Katigo karano didakwakan
Kaampek karano panjalehan dakwa

Ampek macam manjawab tidak
Partamo batidak (indak mangakui)
Kaduo batidak sabanyak dakwa
Katigo batidak pado sabagian dakwa
Kaampek batidak pado saparuah dakwa atau saparuah batidak

Ampek macam nan buliah basuaro di pangadilan
Partamo urang nan mandakwa
Kaduo urang nan tadakwa
Katigo saksi-saksi nan mandakwa jo nan tadakwa
Kaampek hakim nan ka mamutuihkan

Ampek macamnyo jawab
Partamo diiyokan
Kaduo ditidakkan
Katigo diantahkan
Kaampek disahkan jo sumpah

Kaputusan sangketo nan ampek
Partamo mamakai hukum
Kaduo manggunokan limbago
Katigo karano takuik
Kaampek karano baralah (mangalah)

Ampek nan dilarang
Partamo jan hiduik badangki-dangkian
Kaduo jan hino mahinokan dalam pagaulan
Katigo jan batoloang-toloangan ateh karajo maksiaik jo karajo jahek
Kaampek jan mahasuik maadu domba

Ampek macam cupak
Partamo cupak usali
Kaduo cupak buetan
Katigo cupak tiruan
Kaampek cupak nan piawai

Ampek macam cupak nan piawai
Partamo batanam nan bapucuak
Kaduo bacupak bagantang
Katigo minum jo makan
Kaampek muluik manih baso katuju

Ampek macam cupak tiruan
Partamo pakaian nan rancak
Kaduo paralatan pamainan
Katigo pakakeh alaik kagumbiraan
Kaampek istri nan baiak

Basa ampek Balai
Partamo Bandaro (Titah) di Sungei Tarab
Kaduo Tuan Kadi di Padang Gantiang
Katigo Makudum di Sumaniak
Kaampek Indomo di Suruaso

Urang nan ampek jinih
Partamo andiko (panghulu)
Kaduo malin (ulamo)
Katigo manti (cadiak pandai)
Kaampek dubalang (urang mudo-mudo)

Urang nan ampek golongan
Partamo niniak mamak
Kaduo cadiak pandai
Katigo alim ulamo
Kaampek bundo kanduang

Ampek macam panghulu
Partamo panghulu
Kaduo pangalah
Katigo panghulun
Kaampek pangaliah

Ampek macam hak adaik bagian panghulu
Partamo hak adaik bungo kayu
Kaduo hak adaik takuak kayu
Katigo hak adaik tanam batu
Kaampek hak adaik bungo tanah

Macam urang nan ampek
Partamo urang namonyo
Kaduo takah urang
Katigo angkuah-angkuah urang
Kaampek urang-urangan

Jurai nan ampek
Partamo jurai Limo Puluah Koto
Kaduo jurai Canduang Lasi
Katigo jurai Tanah Data
Kaampek jurai Agam

Ampek suku asa
Partamo suku Budi
Kaduo suku Caniago
Katigo suku Koto
Kaampek suku Piliang

Ampek macam warih
Partamo warih nan sabananyo
Kaduo warih nan sawarih
Katigo warih nan mawarisi
Kaampek nan warih barih

Lumbuang nan ampek
Partamo si Tinjau Lauik
Kaduo si Bayau-bayau
Katigo si tangka Lapa
Kaampek si Pati Jantan

Ampek kunci ilimu
Partamo ilimu kato sama
Kaduo ilimu kato sadiak
Katigo ilimu kato bungkuak bana
Kaampek ilimu kato kurenah

Ampek macam ilimu
Partamo ilimu pitunjuak
Kaduo ilimu najwa
Katigo ilimu takwa
Kaampek ilimu rasik

Ampek sipaik sako
Partamo tabanam
Kaduo tataruah
Katigo dilipek
Kaampek dipakai

Ampek padoman caro mamimpin
Partamo bapadoman ka alue patuik
Kaduo manampuah jalan nan pasa
Katigo mamaliharo anak kamanakan
Kaampek manjago harato pusako

Ampek larangan caro mamimpin
Partamo mambuek cabuah sio-sio
Kaduo maninggakan sidiak jo takaliak
Katigo mahariak manghantam tanah
Kaampek bataratak bakato asiang

Ampek macam taguah bapandirian
Partamo panghulu taguah di adaik
Kaduo malin taguah di agamo
Katigo manti taguah di buek
Kaampek dubalang taguah di nagari

Ampek macam limbago urang badunsanak
Partamo kok jauah cinto mancinto
Kaduo kok hampie jalang manjalang
Katigo kok kurang tukuak manukuak
Kaampek kok sampik lapang malapangi

Ampek macam batang aka
Partamo syariaik
Kaduo tarikaik
Katigo hakikaik
Kaampek makripaik

Ampek macam caro manantukan aka
Partamo karano diliek jo mato
Kaduo karano didanga jo talingo
Katigo karano dicium jo hiduang
Kaampek karano dirasokan jo lidah atau jo badan

Ampek macam timbuenyo aka
Partamo dari diri sandiri
Kaduo dari urang lain
Katigo dari tawaka (pitunjuak dari Tuhan)
Kaampek dari kapintaran (baraka)

Ampek macam asa datangnyo bana
Partamo dari dalie Tuhan
Kaduo dari Hadih Rasul
Katigo dari kato pusako K
aampek dari kato mupakaik

Ampek sabab hilangnyo bana
Partamo karano banyak bicaro
Kaduo karano caro babicaro
Katigo karano tipu dayo
Kaampek karano tak taliti hati-hati

Ampek macam nan manjauahnyo bana
Partamo karano takuik jo malu
Kaduo karano kasiah sayang
Katigo karano rugi dek balabo
Kaampek karano dipuji jo disanjuang

Ampek macam nan disabuik bana
Partamo jujur
Kaduo luruih
Katigo malatakkan sasuatu di tampeknyo
Kaampek lawan bana duto

Ampek macam caro kiaik bapikie
Partamo pikie palito hati
Kaduo nanang hulu bicaro
Katigo haniang saribu aka
Kaampek dek saba bana nan datang

Ampek macam nan paralu dikatahui
Partamo tahu pado diri
Kaduo tahu pado urang lain
Katigo tahu pado alam
Kaampek tahu pado Nan Maha Kuaso

Ampek macam martabaik manusia
Partamo cadiak
Kaduo candokio
Katigo gudiman
Kaampek arih

Ampek macam nan tapakai dalam pagaulan
Partamo raso
Kaduo pareso
Katigo malu
Kaampek sopan

Ampek macam paham
Partamo wakatu bungo sadang kambang
Kaduo katiko angin sadang lunak
Katigo sadang dipa-antaroan
Kaampek katiko wakatu tampek tumbuah

Malam samalam dibagi ampek
Sabagian untuak makan
Sabagian untuak baibadaik
Sabagian untuak bapikie
Sabagian untuak tidue (lalok)

Ampek macam sarikaik
Partamo sarikaik sarikati
Kaduo sarikaik sarikato
Katigo sarikaik muawadah
Kaampek sarikaik maagna

Ampek macam alasan pusako digadai-dijua
Partamo untuak pambangkik batang tarandam
Kaduo karano rumah gadang katirisan
Katigo gadih gadang alun basuami
Kaampek maik tabujue tangah rumah

Sumber : Buku "Kato Pusako"
Page 5 of 29 |  < 1 2 3 4 5 6 7 8 9 10 >  Last ›
Home > Kaskuser Regional > INDONESIA > SUMATERA > Minangkabau > Adaik, Budayo, Seni, & Sejarah Minangkabau